Bienveníu/da a la nueva páxina web del Conceyu de Gozón. Esta ferramienta convirtióse en daqué imprescindible na actualidá: Buscar una cai, un llugar onde comer o facer un trámite al traviés de la rede son xeres que pasaron a formar parte de la vida cotidiana de la mayor parte la ciudadanía.

El nuevu portal municipal nun quier ufiertar a los vecinos y vecines de Gozón namás que la posibilidá d'averase a los servicios daos dende'l nuestru Conceyu, sinón tamién ser un escaparate pa que cualquier persona, nun importa'l llugar del mundu onde s'atope, pueda conocer tolo que-y puede ufiertar el nuestru conceyu: Facer un percorríu curtiu pel nuestru paisaxe, introducise na nuestra cultura, o conocer parte de la nuestra ufierta gastronómica, una curtia síntesis de too ello como invitación pa  venir visitanos. Fáiganlo, Gozón nun-los va defraudar.

La tresparencia, oxetivu ineludible por cualquier alministración pública, tamién se va ver reforzada poles posibilidaes qu'ufierta esti nuevu portal.

Sicasí, nun podemos escaecer de tola xente qu'entá tien dificultaes técniques pa poder entrar a la rede. Falta, énte la que nun podemos permanecer impasibles. A día de güei munches parroquies del nuestru conceyu nun pueden tener un accesu de calidá a la rede, lo que-yos torga poder facer usu de toles prestaciones qu’ufierta una páxina web, como la qu'equí se presenta. El nuestru compromisu, trabayar na busca d'una solución. Nun podemos sentinos satisfechos de tener una bona páxina web, nin podemos dicir que munchos trámites pueden faese al traviés de la rede, hasta que tolos/les nuestros/es vecinos y vecines tengan la posibilidá de facelos, independientemente del so llugar de residencia.

Esperando que nun futuru non mui alloñáu esti portal pueda valir como mediu eficaz de comunicación ente TOLA ciudadanía y l'alministración, lo qu'ensin dulda va redundar nuna meyor atención ciudadana, aprovecho esta ocasión pa tresmitir el mio saludu más cordial.

Jorge Suárez García. Alcalde de Gozón.